Gʻolib voleybolchilar taqdirlandi

Joriy yilning 26-27-yanvar hamda 2-3-fevral kunlari 14 yoshgacha va 17 yoshgacha boʻlgan oʻgʻil bolalar va qizlar oʻrtasida viloyat kubogi musobaqasi boʻlib oʻtdi. Besh muhim tashabbus doirasida tashkil etilgan sport tadbirlarida viloyatimizning barcha tumanlaridan yosh voleybolchilar gʻoliblik uchun kurashishdi. 

Zarbdor tumani sport maktabida musobaqa gʻoliblarini taqdirlash marosimi oʻtkazildi. Tadbirda viloyat IIB boshligʻi oʻrinbosari, podpolkovnik R.Boʻriyev yurtimizda ommaviy sport turlarini rivojlantirish borasidagi ishlar, mazkur bellashuvlarning ahamiyati va shaxs kamolotidagi oʻrni xususida toʻxtaldi. Shuningdek, kuchli uchlikdan oʻrin olgan oʻgʻil bolalar va qizlar jamoalari viloyat IIBning medal, diplom va qimmatbaho sovgʻalari bilan taqdirlanishdi.
Endilikda gʻoliblikni qoʻlga kiritgan voleybolchilar 19-26-fevral kunlari Fargʻona va Namangan viloyatlarida oʻtadigan Respublika bosiqichida viloyatimiz sharafini himoya qiladi.